Siglir tar il cuntegn

Naziunal/Internaziunal Schlet attestat da doping en il passlung

In nov rapport mussa che 46% da las medaglias gudagnadas dapi il 2001 a gieus olimpics sajan vegnidas gudagnadas cun valurs dal sang dubiusas, quai mussa ils resultats d’ina gruppa da retschertga ch'ha survegnì invista tras in whistleblower en las datas da quasi 2'000 sportists d'enviern.

Chommas da passlunghists durant ils gieus olimpics a Sotchi.
Legenda: In rapport da doping dat ina schleta nota als passlunghists. Keystone

Las datas en vegnidas surdadas a la redacziun da doping da l’emettur tudestg ARD, a la Sunday Times en Gronda Britannia e tranter auter era al magazin online republik.ch en Svizra. Tenor questas datas mussian ils tests da sang da radund 50 passlunghists ch'èn era da la partida als gieus olimpics en Corea dal sid, valurs suspectusas.

Il medi dals Stadis Unids, James Stray-Gunderson che ha lavurà pli baud per la Federaziun internaziunala da skis (FIS), manegia en il rapport da l'ARD:

I dat in dumber considerabel da victurs da medaglias cun profils da sang nunusitads u perfin fitg nunusitads. Quai inditgescha ina derasaziun da doping remartgabla en il passlung.
Autur: James Stray-Gundersonmedi en ils Stadis Unids

Sportists svizzers betg numnads

En tut hajan 290 passlunghists sa fatg suspectus cun valurs betg normalas. La gronda part dals atlets è da la Russia, dentant er atlets da la Germania, Frantscha, Norvegia, Finnlandia e l'Austria sajan pertutgads. Sportists svizzers da passlung na vegnan betg numnads.

Tenor experts giascha la probabilitad, che las valurs nunusitadas tar tants topatlets hajan in auter motiv che doping, tar sut 1%.

RR novitads 11:00