Siglir tar il cuntegn

Header

cuntegn

Naziunal/Internaziunal Schurter e sia missiun «Big in Japan»

Il countdown per ils proxims gieus olimpics da stad «Tokio 2020» han cumenzà, er per il mountainbiker Nino Schurter che vul defender là ses titel.

Sut il motto «Big in Japan» ha la Federaziun svizra da velo Swiss Cycling envidà ad in emprim inscunter cun ils mountainbikers svizzers che vulan gudagnar ina medaglia en bun 14 mais en il Giapun. Il plaschair sin quest punct culminant da l’onn proxim è grond, er tar Schurter che sto dentant sco tut ils auters l’emprim er sa qualifitgar per quests gieus olimpics, quai malgrà ch’el ha dominà la scena da mountainbike il davos decenni.

Sche jau dastga anc ir ina giada a gieus olimpics e gudagnar là ina medaglia fiss quai perfect per mia carriera.
Autur: Nino Schurtermountainbiker

Mintga cursa quinta per Tokio

La qualificaziun per Tokio 2020 cumenza gia ussa. Swiss Cycling po trametter vers il Giapun mintgamai ils megliers durant la stagiun da la cuppa mundiala da quest onn. Vitiers quintan anc ils campiunadis mundials la fin avust a Mont Sainte-Anne en il Canada e l’emprima cursa da la cuppa mundiala da la proxima stagiun 2020. Uschia èn ils proxims gieus olimpics gia ussa preschents tar mintga atlet.

Tokio è insatge tut nov

A la fin da questa stagiun, durant l’october, pon Nino Schurter e collegas gia ina giada fufragnar l’aria da Tokio, ina metropola cun radund 10 milliuns abitants. Durant duas emnas dastgan ils mountainbikers svizzers far las emprimas experientschas sin il traject da cursa, avair invista nua ch’il dachasa fiss durant quels gieus olimpics e sa chapescha er gia s’endisar in zic vid il clima e la cultura giapunaisa. Per Nino Schurter èsi in nov mund, el saja anc mai stà en il Giapun.

Jau sper ch’i dettia anc ina giada ina medaglia dad aur. Ma forsa datti er puspè ina d’argient, forsa vai puspè da stgala giu, tgi sa.
Autur: Nino Schurtercampiun olimpic 2016

Adina ir da stgala si a gieus olimpics

Als gieus olimpics il 2008 a Peking ha Schurter gudagnà sensaziunalmain la medaglia da bronz. Quatter onns pli tard ha el lura sco grond favurit gudagnà argient a Londra. Als davos gieus olimpics il 2016 a Rio ha il mountainbiker, oriund da Tersnaus encurunà sia carriera cun la medaglia dad aur. Vitiers vegnan anc set titels da campiun mundial. La gronda finamira è ussa da defender il titel da campiun olimpic l’onn proxim a Tokio ed uschia metter si il viertgel ad ina carriera gloriusa e magnifica.

RR actualitad 07:00