Schurter per la quarta

Gia per la quarta giada è il mountainbiker lumnezian Nino Schurter vegnì onurà cun il Swiss Cycling Award, il premi per il meglier ciclist svizzer da l'onn. Il campiun mundial da record è vegnì undrà a chaschun d'ina gala a Turitg.

purtret da Nino Schurter Bild in Lightbox öffnen.

Legenda da maletgs: Gia per la quarta giada vegn Nino Schurter onurà cun il Swiss Cycling Award. Keystone

Che la Federaziun svizra da ciclissem undreschia Nino Schurter gia per la quarta giada sco meglier ciclist da l'onn è stà inevitabel. La finala ha il mountainbiker da Tersnaus gì ina stagiun perfetga. Il campiun olimpic da Rio ha gudagnà quest onn sco emprim mountainbiker insumma tuttas cursas da la cuppa mundiala - e lu ha il sportist da 31onns er anc curunà la stagiun cun ses sisavel titel da campiun mundial - in record.

En vista a tals success èsi mo anc detagls a l'ur che Nino Schurter è anc vegnì campiun mundial cun l'equipa ed er ina giada dapli campiun svizzer.

Neff tar las dunnas

Meglra ciclista svizra è la campiunessa mundiala da mountainbike Jolanda Neff. Il titel per la meglra equipa va medemamain als mountainbikers. L'equipa enturn Neff e Schurter aveva gudagnà a Cairns en l'Australia il titel da campiun mundial.

RR novitads 22:00