Siglir tar il cuntegn

Header

Navigaziun

Purtret da Dario Cologna.
Legenda: Quest onn na vala Dario Cologna betg sco favurit. Keystone
cuntegn

Seefeld 2019 Dario Cologna per ina giada betg in dals favurits

Il grond trumf svizzer als campiunadis mundials da ski nordic a Seefeld è Dario Cologna. Il passlunghist da la Val Müstair ha dentant fatg il viadi vers il Tirol senza in sulet plaz da podest en questa stagiun.

Pervia da difficultads cun la sanadad a l’entschatta da l’onn ha Dario Cologna er stuì dar si il Tour de Ski ch’el ha gia gudagnà quatter giadas en sia carriera. Silsuenter ha Cologna fatg in lunga pausa e propi mess il focus cumplettamain sin quels campiunadis mundials, il punct culminant da la stagiun.

Hudac ed Iseppi èn da buna speranza

Malgrà ina stagiun in zic disgraziada è ses conturn da buna speranza ch’i pudess er gartegiar quest onn da far il pass sin il podest. Tenor il trenader Ivan Hudac haja Dario Cologna trenà fitg bain las davosas emnas ed el saja actualmain en ina buna furma. Er l’expert Adriano Iseppi crai che bler saja pussibel sche tut constat. Oravant tut en las cursas da distanza sco il skiatlon e la cursa roiala da 50 kilometers pudessi gartegiar cun in’ulteriura medaglia. Ed ad eveniments gronds ha il quatter dubel campiun olimpic e campiun mundial adina puspè mussà ch’el è buns da batter ils megliers dals megliers.

Sonda l'emprima cursa per Cologna

Dario Cologna va l’emprima giada la sonda, ils 23 da favrer, a la partenza, quai en il skiatlon sur 30 kilometers. L’emprim vegn currì 15 kilometers en il stil classic, lura 15 kilometers en il stil liber. Er al skiatlon fan part Toni Livers, Jonas Baumann e Beda Klee.

RR actualitad 17:00