Curt avant ils campiunadis mundials a Seefeld ha Nadine Fähndrich realisà il meglier resultat da sia carriera. A Cogne en l'Italia è ella vegnida segunda da la cursa sur 10 kilometers en il stil classic. Varga 30 onns suenter Evi Kratzer ha uschia puspè ina giada ina dunna svizra fatg il pass sin in podest da la cuppa mundiala tar ina cursa da distanza lunga.
Partida cun handicap en ils campiunadis mundials
Fin qua è Nadine Fähndrich sa participada a duas cursas tar ils campiunadis mundials a Seefeld. Ella è vegnida 7avla en il sprint, ed ensemen cun Laurien van der Graaff 8avla en il sprint d’equipa. Fähndrich è dentant ida cun in impediment a la partenza. La curridra da Horw en il chantun Lucerna aveva problems cun il magun ed ha stuì render l’emna passada. La preparaziun sin las cursas era uschia tut auter che optimala. Uss è Fähndrich dentant puspè sin la via da meglierament ed ella spetga sin la proxima cursa.
RR actualitad 07:00
