Siglir tar il cuntegn

Header

Navigaziun

cuntegn

Seefeld 2019 Schoc e consternaziun suenter arrestaziuns

La razzia da doping a Seefeld ha schoccà e consternescha bleras persunas en il sport da professiun.

Legenda: Tadlar il audio Bunura: Adriano Iseppi davart il scandal da doping a Seefeld. Durada 05:37 minutas.
05:37 min, Actualitad dals 28.02.2019.

Dus atlets dal team da sport da l'Austria èn vegnids traplads da la polizia. Els han dopà cun transfusiuns da sang. Quai n'èn betg ils emprims atlets da l'ÖSV che han fatg quai. Il coordinatur da passlung dals Austriacs, Trond Nystad è enorm trumpà.

Jau avess pensà ch'els treneschan e betg ch'i fetschian uschè ina merda.
Autur: Trond NystadCoordinatur da passlung dals Austriacs

Per Nystad è cler ch'il pensum tar l'associaziun vegn uschia nuninteressant per el. Nystad vala sco in ferm cumbattant dal doping.

Nagut è pli vargugnus che da cumprar megliers resultats entras metodas ch'augmentan la prestaziun a moda illegala. Jau sun enorm grit ch'intgins atlets na paran betg d'avair emprendì or dal passà.
Autur: Peter SchröcksnadelPresident dal ÖSV

Il president da l'ÖSV, Peter Schröcksnadel è trumpà nunditg dals atlets. En l'ÖSV na dettia nagina toleranza per doping. Schröcksnadel ha er ditg che l'associaziun vegnia a far tut ses pussaivel cunter doping. I dettia er indizis che trenaders u coachs sajan involvids en il cas. Suenter la fin da la stagiun vul el organisar cumplettamain da nov il sport da passlung.

Quai è in dir culp per il passlung en general. Jau sun schoccà. Quai n'è gea betg l'emprima giada e sco i vesa or er betg l'ultima giada.
Autur: Markus GandlerManader sportiv dal ÖSV

Consternà è er stà il manader sportiv da l'ÖSV, Markus Gandler. El è funcziunari dapi il 2003 ed è er gia stà da la partida tar las razzias dad Olympia il 2006 a Turin.

Pli tup na vai betg pli e pli bass na pon ins betg pli crudar. Nus essan en Austria gia stads en ina rusna cun il passlung, uss essan nus crudads anc pli bass ed jau na less gnanc savair quant aval ch'i pudess anc ir.
Autur: Alois StadloberExpert da passlung tar ORF

L'Expert da passlung tar ORF, Alois Stadlober è sez bab da dus atlets che partan als campiunadis mundials. Sia figlia Teresa e ses figl Luis.

Dario Cologna: «Igl è ina schleta novitad per il sport»

RR novitads 17:00