Igl è la segunda giada suenter il 1985 ch’ils campiunadis mundials da ski nordic èn a Seefeld, betg lunsch davent dal cunfin svizzer. Gia trais giadas ha questa regiun astgà manar atras las occurrenzas nordicas a gieus olimpics, il 1964, il 1976 ed il 2012. A la partenza van radund 700 atletas ed atlets ord 60 pajais.
Seefeld èn il Tirol schai sin ina planira auta sin bun 1’200 meters sur mar e vala sco in mecca dal sport nordic en l’Europa. Onn per onn dastga Seefeld era beneventà ils megliers atlets dal mund a diversas concurrenzas da la cuppa mundiala.
18 Svizzers als campiunadis mundials
Sa qualifitgads per ils 52avels campiunadis mundials da ski nordic dals 20 da favrer fin ils 3 da mars èn era 18 atletas ed atlets svizzers, tranter quels 13 passlungists, 4 atlets che van a la partenza a las concurrenzas da siglir cun skis, e lura Tim Hug, il sulet svizzer che parta en la cumbinaziun nordica. La finamira da Swiss Ski è da turnar a chasa cun ina medaglia. La gronda speranza è Dario Cologna, la locomotiva da la delegaziun svizra. Ma er da las duas passlungistas Laurien van der Graaff e Nadine Fähndrich dastgan ins spetgar in exploit.
Norvegia e Russia
Ils gronds favurits a quests campiunadis mundials en l’Austria derivan da la Norvegia, oravant tut en las cursas da passlung. Il grond favurit e star è il giuven Johannes Hösflot Klaebo, il leader dal classament general e victur dal Tour de Ski. Ils gronds rivals dals Norvegiais pudessan esser ils Russ, la suletta naziun che po actualmain tegnair pitg cun l’armada norvegiaisa.
RR actualitad 06:00 / 17:00