Siglir tar il cuntegn

Header

Navigaziun

cuntegn

Seefeld 2019 Traplà in flagranti in atlet

En in'acziun coordinada a Seefeld ed en Germania èn vegnids arrestads en tut 9 persunas. En pli ha la polizia fatg 16 perquisiziuns da chasas. Quai ha communitgà il Bundeskriminalamt da l'Austria. Durant la razzia ha la polizia traplà inflagranti in dals atlets dals campiunadis mundials.

Purtret d'in hotel e davant in auto da polizia.
Legenda: L'auto da polizia stat davant l'hotel Bergland a Seefeld. En quest hotel èn las chombras dals sigliders ed ils skiunz da passlung dal ÖSV, da l'Austria. Keystone

Enturn in medi tudestg hajan ins pudì investigar e chattar cun quai in circul internaziunal che fascheva fatschentas cun doping. Quest circul saja culpabel d'avair cugliunà gia dapi onns cun doping da sang tar sportists professiunals.

Doping da sang

Personen-Box aufklappenPersonen-Box zuklappen

Blers atlets van en l'autezza per trenar, fin 1'500 meters sur mar. En l'autezza hai pli pauca aria ed il corp producescha dapli corpuls cotschens. Quai per ch'il corp possia transportar dapli oxigen. Dapli oxigen en il corp munta er dapli forza per la musculatura. Quest trenament en l'autezza sco tal è lubì.

Quels che cugliunan cun la metoda da doping da sang, tiran lura dentant giu il sang cun ina transfusiun e mettan quel en salv. Ad in eveniment vegn lura quest sang che cuntegna blers corpuls cotschens puspè dà enavos en il corp. Uschia han lura ils atlets durant la cursa dapli forza ch'ils auters.

Tschintg atlets

En in'acziun communabla han la polizia tudestga ed austriaca arrestà a Seefeld set persunas. Dus tutgan tar il circul da questa gruppaziun criminala e tschintg èn atlets. Tar ils atlets sa tracti da dus Austriacs, in Casac e dus Estons. Il schef da sport austriac, Markus Gandler ha confermà envers ORF ch'i sa tractia dals dus atlets austriacs, Dominik Baldauf e Max Hauke. Tar l'equipa da skis nordic da la Germania, il DSV, n'haja dà nagina razzia, quai ha declerà in pledader. Il medem mument ha la polizia arrestà en Germania il medi responsabel sco era in cumplizi.

Sche las renfatschas sa cumprovan, fiss quai il culp da grazia per il sport da passlung en l'Austria.
Autur: Patrick SchmidExpert da doping dad SRF

Traplà in flagranti in dals atlets

In dals atlets ha la polizia traplà, cura ch'el haja anc gì vi dal bratsch la transfusiun da sang. Quai ha declerà Dieter Csefan dal Bundeskriminalamt, durant la conferenza da pressa. Da tgenin dals tschintg sportists arrestads ch'i sa tractia n'è betg vegnì communitgà.

A nus èsi gartegià da traplar in flagranti in dals atlets.
Autur: Dieter CsefanBundeskriminalamt Austria

Entaifer las proximas 48 uras sto la polizia uss decider, tgenins dals atlets che restan en arrest.

Gia traplà Austriacs cun doping

L'arrestaziun dals dus atlets è ina trista chaussa per l'Austria. Gia il 2006 avevan ins traplà plirs atlets cun doping. La naziun ha sinaquai duvrà onns da puspè fitgar pe en ils campiunadis mundials. Durant ils gieus olimpics da Pyeongchang hai lura dà il proxim scandal: Johannes Dürr è vegnì trapla.

RR novitads 14:00