El è stà durant las davosas stagiuns ina da las grondas figuras tar il club da hockey da Tavau. Leonardo Genoni è stà ina ferma pitga en l’equipa da Tavau, ina ferma pitga tranter las pitgas dal gol, pudess'ins dir. Uss dat el per il SC Berna. Ed ils giuvens golis han uss ina greva ierta. Gilles Senn, ch’è gia dapi in pèr onns tar il HCD cumbatta cun Joren van Pottelberghe ch’è vegnì ord la Svezia da Linköping, per il plaz en il gol dals da Tavau. Ils experiments cun golis giuvens han fin uss fitg savens gì success. Exempels per quai èn Jonas Hiller, Reto Berra ed il gia menziunà Leonardo Genoni. Il trenader Arno Del Curto, ensemen cun il trenader da golis Marcel Kull, han enfin uss adina gì in bun maun quai che pertutga ils golis giuvens.
In auter segn da dumonda èn ils giugaders da l'exteriur. Il giugader naziunal tschec Robert Kousal n’ha enfin uss anc betg persvadì en ils gieus da test e da la Champions League. Tenor il trenader dovria el dentant anc in zic temp da s’endisar vid il conturn a Tavau. In auter giugader da l'exteriur è il Svedais Daniel Rahimi. El vala sco defensur che gioga defensiv. Quai è plitost nunusità, pertge che normalmain èn ils giugaders da l'exteriur che vegnan recrutads en Svizra plitost giugaders offensivs che sajettan era gols. Rahimi perencunter duai stabilisar la defensiva ed era dar vinavant sia savida als giuvens defensurs da Tavau.
Sper Rahimi e Kousal giogan sco gia ils davos onns anc il Svedais Dick Axelsson ed il Finlandais Perttu Lindgren puspè en il dress da Tavau. Els vegnan a giugar in’impurtanta rolla en l’equipa. Quai vala dentant era per plirs giugaders svizzers, davent dal chapitani Andres Ambühl fin ils frars Wieser ed il defensur rutinà Félicien Du Bois.
L'emprim gieu da la stagiun dat il HCD il venderdi saira ordaifer cun Ambrì-Piotta. La sonda saira retschaivan ils da Tavau lura l'EV Zug. Era questa stagiun pudais tadlar tut ils gieus dal HCD live al Radio Rumantsch.
RR actualitad 17:00