Tenor il capitani svizzer Mark Streit stoppien els esser cuntents ch’els han insumma pudì egualisar la partida al 1:1 en il davos terz. Els hajan manchentà schanzas ed i saja piter da perder uschia. En il davos terz ha la Svizra empruvà da giugar offensiv. Quai n’è dentant betg reussì bain, ils Lettons han nizzegia in schlet pass da Streit e fatg il 2:1.
La partida
Suenter l'emprim terz eri en la partida anc 0:0 tranter l'equipa naziunala da hockey svizra e l'equipa da la Lettonia. En il segund terz ha il letton Andris Dzerins sajettà il 1:0 per la Lettonia. Strusch duas minutas avant la fin dal davos terz èsi gartegià a Matthias Bieber d’egualisar la partida. En l’overtime da 5 minutas fa Daugavins il segund gol, uschia gudogna la Lettonia la partida cunter la Svizra. Per la Svizra hai dà mo in punct.
8 puncts
La Svizra ha absolvì quatter gieus entaifer tschintg dis, uss ha l’equipa naziunala in di pausa. La proxima partida è sonda. En la gruppa A è la Svizra actualmain sin plaz trais da la tabella, quai cun 8 puncts suenter 4 gieus. Venderdi saira dattan anc ils favurits da la gruppa, la Svezia cunter il Canada.
En la gruppa B ha la Russia battì il Danmarc cun 5:2.
RR novitads 20:00