Naziunal/Internaziunal - Senderos, Widmer e Zuffi betg a l'Euro

Dus dis suenter il gieu da test encunter la Belgia ha il trenader naziunal da ballape Vladimir Petkovic preschentà a Lugano ses cader definitiv da 23 giugaders per l’Euro 2016 en Frantscha. Sco ultims ha Petkovic stritgà da ses cader provisoric:

• Philippe Senderos, defensur. Quai di Petkovic: «Igl è in grev mument per el. El ha ultimamain pers in zic la fidanza, ils sentiments positivs n’eran betg qua.»
• Silvan Widmer, defensur. Quai di Petkovic: «El ha fatg ina buna chaussa qua ed er en ses club. Ma el ha dus giugaders davant el (Lichtsteiner e Lang, ann. d. red.) ch’èn ordavant ad el.»
• Luca Zuffi, giugader da mez. Quai di Petkovic: «El è vegnì tar la naziunala ch’èl era spussà. Il temp n’ha para betg tanschì da cumenzar l’Euro cumplettamain ruassà.»

Gia enconuschent era che Petkovic desistia da l’anteriur capitani Gökhan Inler ch’ha giugà quest onn gnanc ina secunda cun ses club Leicester City, il nov campiun englais.

audio

Bunura: Petkovic ha nominà ses cader per l'EURO

02:33 min, ord Actualitad dals 31.05.2016.

laschar ir. Durada: 2 minutas 33 Secundas.

Sommer, Lichtsteiner, Xhaka, Behrami e Xhaqiri sco giugaders-clav

Per il campiunadi da ballape en Frantscha ha Vladimir Petkovic nominà 3 golis, 8 defensurs e 12 giugaders dal camp da mez e da l’attatga. Giugaders-clav en l’equipa svizra èn il goli Yann Sommer da Borussia Mönchengladbach ed il nov capitani Stephan Lichtsteiner da Juventus Torino. Plinavon en il camp da mez trais giugaders che dattan en l’Engalterra, Valon Behrami da Watford, Xherdan Shaqiri da Stoke City e Granit Xhaka ch’ha midà da Mönchengladbach tar Arsenal.

Anc in test avant l’Euro

Ils 23 giugaders che van all’Euro treneschan quest’emna anc a Lugano. Venderdis saira a las 18.00 uras è lura il davos test. La naziunala svizra dat en il stadion Cornaredo a Lugano encunter la Moldavia. Glindesdi parta l’entira equipa lura viers Montpellier en il sid da la Frantscha. Là prenda l’equipa dimora durant il turnier.

L’Albania sco emprim adversari, la Frantscha sco favurit da gruppa

L’emprim gieu a l’Euro ha la Svizra ils 11 da zercladur a Lens encunter l’Albania. Là vegni a dar per l’emprima giada en l’istorgia da l’Euro in duel tranter dus frars. Granit Xhaka dat cun la Svizra, ses frar pli vegl Taulant per l’Albania.

Ils 15 da zercladur dat la Svizra lura a Paris encunter la Rumenia ed ils 19 a Lille encunter la Frantscha, il grond favurit da la gruppa A ed in dils favurits per il titel.