Senza Djourou e Moubandje encunter l’Irlanda dal Nord

Per ils dus gieus da barrage encunter l’Irlanda dal Nord ha il trenader naziunal svizzer nominà 24 giugaders. Betg da la partida èn ils dus defensurs Johan Djourou e François Moubandje.

purtret da Johann Djourou Bild in Lightbox öffnen.

Legenda da maletgs: Johann Djourou è in dals blessads che manchentan la barrascha. Keystone

Djourou patescha d’ina blessura vid in schanugl, Moubandje manchenta questa fasa finala en vista als proxims campiunadis mundials il 2018 en Russia pervia da problems cun in giarlet. Per Djourou vegn pli probabel Nico Elvedi u Manuel Akanji a giugar en la defensiun centrala sper Fabian Schär.

Betg nominà ha Petkovic er Eren Derdiyok. L’attatgader da Galatasaray Istanbul ha strusch pli dastgar giugar en ils davos gieus da campiunadi en la liga tirca. Persuenter ha il trenader naziunal clamà enavos en il cader ils dus cusrins Edimilson e Gelson Fernandes.

Behrami è enavos

Er sin la glista da cader figurescha Valon Behrami. Sch’il giugader central d’Udinese po dentant giugar encunter ils Nordirlandais stat scrit en las stailas. Behrami patescha dapi in temp da problems cun ils aducturs. El vegnia dentant a far tut il pussibel per pudair dar, eventual er pir il segund gieu da barrascha a Basilea.

L’emprim gieu da barrascha dat la naziunala Svizra la gievgia saira, ils 9 da november, ordaifer a Belfast. Il gieu da return è lura trais dis pli tard (12-11) en il St. Jakob-Park a Basilea.

RR actualitad 17:00