Siglir tar il cuntegn

Naziunal/Internaziunal Sepp Blatter e Michel Platini èn vegnids suspendids per 90 dis

La cumissiun etica da la FIFA ha suspendì Sepp Blatter e Michel Platini per mintgamai 90 dis.

Platini e Blatter.
Legenda: Ils 2 pli auts funcziunaris dal ballape, Sepp Blatter, president da la FIFA e Michel Platini, president da l'UEFA. Keystone
Guido Tognoni.
Legenda: L'anteriur directur da la FIFA ed enconuschider da la Federaziun Internaziunala da ballape, Guido Tognoni. Keystone

La cumissiun etica da la FIFA ha uss suspendì ils 2 funcziunaris Sepp Blatter e Michel Platini per 90 dis.

Issa Hayatou daventa president ad interim

Las sancziuns sajan il resultat da las inquisiziuns, a communitgà il gremi giuridic da la cumissiun. Detagls na dastga il gremi betg publitgar. Tenor il reglament a la FIFA designà il vicepresident Issa Hayatou dal Camerun l'uffizi sco president ad interim.

En in'emprima reacziun ha Blatter exprimì sur ses advocats sia dischillusiun, che la cumissiun etica n'haja betg dà ad el la chaschun da s'exprimer.

Suspensiuns per Blatter, Valcke, Mong Joon

Per Blatter vala uss in scumond d'entrar en ses biro ed el na dastga er betg entrar en in stadion da ballape, quai per 90 dis. Sch'el returna en ses uffizi, è il mument intschert. Er il secretari general Jérôme Valcke è vegnì suspendì da la cumissiun etica. Il Sidcorean Chung Mong Joon, ch'aveva annunzià sias ambiziuns per il presidi da la FIFA, ha la cumissiun etica suspendì per 6 onns. Ultra da quai ha el survegnì in chasti da 100'000 francs.

RR novitads 14:00 / 15:00