Il podest
- 1. Mikaela Shiffrin (USA)
- 2. Frida Hansdotter (Svezia) +1,64 Sekunden
- 3. Wendy Holdener (Svizra) +1,87
La skiunza Mikaela Shiffrin ha gudagnà er il slalom da Kranjska Gora en la Slovenia, quai a moda e maniera suverana. Shiffrin ha declassà l’entira concurrenza e triumfà cun in avantatg dad 1,64 secundas sin la Svedaisa Frida Hansdotter. Terza è vegnida Wendy Holdener en sia disciplina da parada. La Svizra ha pers 1,87 secundas sin Shiffrin.
La gronda victura è ina giada dapli Mikaela Shiffrin ch’ha gia gudagnà il slalom gigant a Kranjska Gora. Tut en tut è l’Americana ussa gia stada 9 giadas sisum il podest en questa stagiun. Il triumf dad oz è il 40avel en la cuppa mundiala da skis.
Las Svizras
- 6. Mélanie Meillard +3,68
- 11. Michelle Gisin +4,71
- 17. Carole Bissig +5,67
- 18. Elena Stoffel +5,86
- OUT Denise Feierabend
Ina buna prestaziun ha danovamain Mélanie Meillard mussà. Ella è vegnida 6avla. Il retard sin Mikaela Shiffrin munta dentant gia a 3,68 secundas. Cun Michelle Gisin sco 11avla (+ 4,71 sec.) ha anc ina terza skiunza svizra cuntanschì in plaz sut las top 15. Puncts da la cuppa mundiala hai er dà per las duas giuvnas svizras Carole Bissig ch’è vegnida 17avla (+ 5,67 sec.) ed Elena Stoffel ch’è vegnida 18avla (+ 5,86 sec.). Crudada ora en il segund percurs è Denise Feierabend.
Mardi, ils 9 da schaner, stat gia sin il program il proxim slalom, quel da notg a Flachau en l’Austria.
RR novitads 14:00