Naziunal/Internaziunal - Simon Ammann sin il podest
Simon Ammann cuntanscha il podest tar la concurrenza a Kuopio en la Finlanda. Cun 106 meters è Ammann schizunt siglì il pli lunsch, n'ha dentant betg pudì mussar ina platgada da Telemark. Gudagnà ha uschia il Tudestg Severin Freund avant il Norvegiais Anders Bardal.
Per Severin Freund è quai gia la sisavla victoria en questa stagiun. En il classament general è Freund sin plazza dus cun 1341 puncts. Sin plazza 1 è Stefan Kraft cun 1368 puncts.
Il segund lunsch è siglì medemamain in Svizzer, Gregor Deschwanden cun 105 meters. El ha terminà la concurrenza sin plazza 9.
Pervi dal ferm vent e las diversas interrupziuns è vegnì quintà il resultat da l'emprim sigl.