Siglir tar il cuntegn

Naziunal/Internaziunal Sin il HCD spetga ina dira stagiun

En paucs dis cumenza la nova stagiun da hockey, er per il HCD che na vala er quest onn betg tranter ils gronds favurits per il titel da campiun svizzer. L’equipa da Tavau lantscha la stagiun 2018/2019 cun in cader giuven e nov.

Arno del Curto
Legenda: Arno del Curto trenescha dapi il 1996 il Club da hockey da Tavau. Keystone

Tuttina è il HCD pront per la nova stagiun. Els hajan lavurà e trenà fitg intensiv ils davos mais manegia il defensur engiadinais Claude-Curdin Paschoud. E damai ch’il HCD n’ha dat betg quest onn en la Champions Hockey League ha l’equipa d’Arno del Curto er giu dapli temp per sa preparar sin il campiunadi svizzer.

Bleras midadas

En il cader dal HCD hai dà bleras midadas ils davos mais. In’entira rotscha da giugaders han bandunà il club, Nando Eggenberger (Oshawa), Marco Forrer (Friburg), Mauro Jörg (Lugano), Simon Kindschi (Langnau), Robert Kousal (Brynäs), Broc Little (Linköping), Anton Rödin (Anaheim), Noah Scheeberger (Friburg), Grégory Sciaroni (Berna), Dario Simion (Zug) e Samuel Walser (Friburg). Il HCD ha dentant er engaschà intgins giugaders novs. Quai èn Sami Sandell (Ilves Tampere), Thierry Bader (Kloten), Luca Hischier (Berna), Dario Meyer (Berna), Inti Pestoni (ZSC Lions), Shane Prince (NY Islanders), Lukas Stoop (Kloten) ed Anders Lindbäck (Nashville Predators).

Nov goli per il HCD

In’emna avant ch’il campiunadi svizzer cumenza ha il Club da hockey da Tavau engaschà in nov goli, numnadamain Anders Lindbäck che vegn ord l’organisaziun dals Nashville Predators. Lindbäck ha 30 onns, è 1,98 meters gronds e bunamain 100 kilos. Tuttina vala il Svedais sco in goli fitg movibel cun buns reflexs.

Anders Lindbäck arriva la dumengia, ils 16 da settember, a Tavau. Survegn el la licenza fin il venderdi stat il nov goli gia a disposiziun tar ils emprims gieus da campiunadi. Sper Lindbäck figureschan en il cader dal HCD er ils golis Gilles Senn e Joren van Pottelberghe.

Gieus da chasa live al Radio Rumantsch

Il HCD lantscha la nova stagiun il venderdi, ils 21 da settember, cun il gieu ordaifer encunter il HC Lugano. La sonda, ils 22 da settember dat Tavau ses emprim gieu da chasa, quai encunter il HC Ambri-Piotta. Il Radio Rumantsch rapporta live da tut ils gieus da chasa dal HCD, quai mintgamai a partir da las 20:00 uras.