A Lake Louise en il Canada cumenza la stagiun finalmain er per ils spezialists da speed. Quai cun ina cursa rapida ed in super-g.
Carlo Janka ha surprendì en il trenament
Duas giadas il meglier temp en il trenament per la cursa rapida a Lake Louise – il skiunz da Sursaissa ha surprendì tar la partenza en la stagiun da skis nova. Pervi da problems cun ses dies aveva Janka savì trenar pli pauc che ses collegas en la squadra. Suenter las bunas prestaziuns en il trenament tutga Carlo Janka dentant tar ils favurits da l'emprima cursa.
Il campiun olimpic e mundial ha mussà ina giada dapli ch'el n'è betg in sportist che lai metter sut. Memia bler haja el gia fatg atras. Il plaschair e la motivaziun sajan anc adina gronds. Quai malgrà ch'el n'è las ultimas stagiuns betg propi vegnì sin turas:
Jau crai anc adina che bler è pussaivel.
Ils trenaments per la cursa rapida a Lake Louise han entant dà raschun al skiunz grischun – uss vai per mantegnair quel schlantsch er en la cursa sez.
Da Mauro Caviezel vegn spetgà bler
Spanegià dastgan ins esser sin Mauro Caviezel, il skiunz da Lai che ha fatg l'onn passà il pass en l'elita mundiala. Tschintg giadas è el stà sin il podest, il classament general dal Super-G ha el terminà sin plazza 3. Cler è uschia era ch'i vegn spetgà bler dal skiunz da 31 onns. El na lascha dentant betg sa starmentar:
Igl è impurtant da restar luc. Igl è dentant cler ch'jau vi er quest onn tegnair pitg als megliers.
Mauro Caviezel menziuna spezialmain l'impurtanza dal cumenzament da la stagiun. Ina buna partenza sappia dar schlantsch per l'entir onn. Sco per exempel l'onn passà, nua ch'el ha gist fatg trais giadas il sigl sin il podest en l'America dal Nord. Ina giada a Lake Louise (Super-G) e 2 giadas a Beaver Creek (Super-G e cursa rapida).
RTR Sportissimo 17:05