Siglir tar il cuntegn

Header

cuntegn

Ski alpin Annulà cursas rapidas a Val Gardena e Val d'Isère

Pervi da la mal'aura na pon las cursas dals umens a Val Gardena a da las dunnas a Val d'Isère betg vegnir manadas tras. Ed er las cursas da skicross ad Inichen en il Tirol dal Sid han stuì vegnir annuladas.

La cursa rapida dals umens da la sonda avantmezdi a Val Gardena ha stuì vegnir desditga. Damai ch'igl ha naivì l'entira notg e naiva per part anc vinavant na po la cursa betg vegnir manada atras, er betg sin in tschancun scursanì. Cura ch'ella vegn prendida suenter, na san ins anc betg.

La proxima cursa dals umens en la cuppa mundiala è dumengia – il slalom gigant ad Alta Badia.

video
Il directur da la cursa a Val Gardena davart l'aura miserabla
Or da Sport-Clip dals 21.12.2019.
laschar ir

Nagina cursa rapida da las dunnas a Val d'Isère

Suenter la cursa rapida dals umens a Val Gardena è er la cursa rapida da las dunnas a Val d'Isère vegnida ditga giu. Gia la bun'ura era la cursa vegnida spustada da las 10:30 sin las 12:30. Pervi da la blera naiv nova, n'ha la pista dentant er betg pudì vegnir preparada sin il nov termin da partenza. Cura e nua che la cursa vegn prendida suenter, n'è anc betg enconuschent.

Ditg giu cursas da skicross pervi da blera naiv

Pervi da la trid'aura e la blera naiv nova, han ins era stuì dir giu l'emprima da duas cursas da la cuppa mundiala da skicross ad Innichen en las Dolomitas dal Tirol dal Sid. Perquai ch'ils skicrossers na po betg ir a la partenza oz sonda, valan ils resultads da qualificaziun da venderdi sco resultads per la cuppa mundiala. Tar las dunnas è Fanny Smith stada la quart sperta ed uschia meglra Svizra e tar ils umens è Joos Berry sco setavel vegnì meglier Svizzer.

Per questa dumengia è planisada in'ulteriura cursa da skicross ad Innichen.

RTR novitads 10:00

Artitgels legids il pli savens

Scrollar a sanestra Scrollar a dretga