Siglir tar il cuntegn

Header

audio
Adelboden: L'atmosfera senza ils fans
Or da Actualitad dals 08.01.2021.
laschar ir. Durada: 5 minutas 20 Secundas.
cuntegn

Ski alpin Cursas da spierts al Chuenisbärgli

Normalmain regia en l’arrivada da las cursas da skis ad Adelboden in’atmosfera gigantica che fa pel giaglina ad in e scadin. Quest onn è quai dentant tut auter. Pervia da la pandemia da corona vegnan las cursas al Chuenisbärgli manadas atras senza fans ed aspectaturs.

La scenaria è nunimaginabla: Cursas da la cuppa mundiala ad Adelboden senza fans. Enstagl ch’ils skiunzs vegnan beneventads en l’arrivada da millis e millis fans cun bandieras e plumpas van las trais cursas, dus slaloms gigants ed in slalom, a fin tut quiet. En l’arrivada sa chattan sper las cabinas da commentar sulet intgins Toi Toi’s ed ina taila che mussa il temp e la rangaziun.

Nagina festa da skis svizra

La gronda festa da skis dad Adelboden manca il 2021. Gist ord vista svizra fa quai mal il cor. Pertge suenter ils spezialists da slalom s’audan uss era ils spezialists da la disciplina slalom gigant tar ils protagonists en la cuppa mundiala, quai suenter ch’il slalom gigant è stà sur onns la disciplina da miseria per ils Svizzers. Ma gist cun Marco Odermatt ha Swiss Ski uss in atlet che tutga propi tar la crème de la crème. Odermatt parta ad Adelboden cun il numer cotschen, il numer da leader en questa disciplina, quai suenter ch’el ha terminà ils emprims slaloms gigants en questa stagiun sin ils plazs 2, 3, 1 e 4.

Gino Caviezel
Legenda: Er senza ils fans vul Gino Caviezel far furora ad Adelboden. Keystone

Gino Caviezel – il trumf grischun

Buns resultats pon ins era spetgar dal Grischun Gino Caviezel che sa senta bain sin la plaunca dal Chuenisbärgli. Avant dus onns è il frar giuven da Mauro Caviezel vegnì 9avel ad Adelboden, l’onn passà 13avel. Quest onn para la furma da constar anc meglier. L’entschatta da la stagiun ha Caviezel persvadì cun ses terz plaz en il slalom gigant da Sölden, ses emprim plaz da podest en la cuppa mundiala.

Dapi 13 onns nagin podest svizzer

En mintga cas fissi nairas uras ch’in Svizzer faschess puspè ina giada il pass sin il podest al classicher dad Adelboden. Dapi 13 onns n’è quai betg pli capità. Il 2008 aveva Marc Berthod triumfà sensaziunalmain al slalom gigant al Chuenisbärgli. Dapi lura han auters procurà per la musica, principalmain Marcel Hirscher ch’è stà 16 giadas sin il podest ad Adelboden, 9 giadas il pli sisum.

Actualitad 08:00

Artitgels legids il pli savens