Siglir tar il cuntegn

Header

cuntegn

Ski alpin Duo grischun pront per Sölden

Il cumbat per puncts e tschientavels en la cuppa mundiala da skis cumenza. Questa fin d’emna vai liber cun la nova stagiun da skis, quai cun ils dus slaloms gigants sin il glatscher da Rettenbach a Sölden.

Swiss Ski trametta a la partenza a Sölden gist 16 skiunzs, 8 umens ed 8 dunnas. Gist tar ils umens ha la Svizra plirs trumfs a la partenza, tranter auter cun il grond talent Marco Odermatt u Loïc Meillard. Plinavant dat Justin Murisier ses comeback suenter ch’el ha gì rut il liom cruschà en il trenament la stad 2018.

Svizras e svizzers al slalom gigant a Sölden

Avrir la box Serrar la box

Dunnas: Wendy Holdener, Michelle Gisin, Lara Gut-Behrami, Corinne Sutter, Simone Wild, Jasmina Suter, Andrea Ellenberger, Lindy Etzensperger

Umens: Gino Caviezel, Thomas Tumler, Marco Odermatt, Loïc Meillard, Justin Murisier, Cédric Noger, Elia Zurbriggen, ulteriur atlet (suenter qualificaziun)

Il slalom gigant da las dunnas è la sonda, quel dals umens la dumengia. L’emprim percurs è mintgamai l’avantmezdi a las 10:00 ed il segund percurs il suentermezdi a las 13:00.

A la partenza èn er il dus Grischuns, Gino Caviezel e Thomas Tumler. Omadus han pudì trenar bain durant la stad e sa legran da puspè pudair concurrenzar cun l’elita mundiala. Gist Tumler ha cun ses terz plaz al slalom gigant avant in onn a Beaver Creek mussà ch’el vegn da tegnair pitg cun ils megliers dals megliers. Er Gino Caviezel vul mussar dapli en la nova stagiun, esser pli constant e gugent er ina giada dumagnar il pass sin il podest d’ina cursa da la cuppa mundiala, i fiss ina premiera.

Holdener vul ir sin il podest

Tar las dunnas è il focus franc sin Wendy Holdener ch’è stada regularmain tranter las meglras 10 la stagiun passada en la disciplina slalom gigant. Questa stagiun vul Holdener dapli, finalmain ina gia dumagnar il pass sin il podest, quai che reussescha ad ella en seria en sia disciplina da parada, il slalom.

audio
Wendy Holdener, il grond trumf svizzer tar las dunnas
ord Actualitad dals 24.10.2019.
laschar ir. Durada: 17 Secundas.

RR actualitad 07:00

Artitgels legids il pli savens