Swiss Ski trametta a la partenza a Sölden gist 16 skiunzs, 8 umens ed 8 dunnas. Gist tar ils umens ha la Svizra plirs trumfs a la partenza, tranter auter cun il grond talent Marco Odermatt u Loïc Meillard. Plinavant dat Justin Murisier ses comeback suenter ch’el ha gì rut il liom cruschà en il trenament la stad 2018.
A la partenza èn er il dus Grischuns, Gino Caviezel e Thomas Tumler. Omadus han pudì trenar bain durant la stad e sa legran da puspè pudair concurrenzar cun l’elita mundiala. Gist Tumler ha cun ses terz plaz al slalom gigant avant in onn a Beaver Creek mussà ch’el vegn da tegnair pitg cun ils megliers dals megliers. Er Gino Caviezel vul mussar dapli en la nova stagiun, esser pli constant e gugent er ina giada dumagnar il pass sin il podest d’ina cursa da la cuppa mundiala, i fiss ina premiera.
Holdener vul ir sin il podest
Tar las dunnas è il focus franc sin Wendy Holdener ch’è stada regularmain tranter las meglras 10 la stagiun passada en la disciplina slalom gigant. Questa stagiun vul Holdener dapli, finalmain ina gia dumagnar il pass sin il podest, quai che reussescha ad ella en seria en sia disciplina da parada, il slalom.
RR actualitad 07:00