Suenter la stagiun passada è Lara Gut-Behrami stada sfurzada dad ir sur ils cudeschs. Igl è numnadamain stada ina stagiun d’emblidar. Oravant tut en la disciplina slalom gigant ha la Tessinaisa pers il contact cun las meglras. Er al campiunadi mundial ad Åre en Svezia è quasi tut ì da l’aua giu.
Al final da la cuppa mundiala ad Andorra è Lara Gut-Behrami anc cupitgada ed ha gì intginas blessuras. Igl è uschia stà ina fin simbolica per ina stagiun pulit disgraziada.
Novs inputs en il sectur da cundiziun
Sin giavisch da Lara Gut-Behrami ha Swiss Ski engaschà in nov trenader da cundiziun, il Spagnol José Luis Alejo Hervas, ch’ha trenà ils davos onns las skiunzas norvegiaisas. Il Spagnol vegn finanzià da la Federaziun da skis svizra. Quai era tar il davos trenader da cundiziun da Lara Gut-Behrami betg il cas. Persuenter sustegn Alejo Hervas er las ulteriuras skiunzas svizras.
Puspè fitgar pe en il slalom gigant
Durant ils davos mais ha Lara Gut-Behrami investì bler temp en tests da material, surtut en il slalom gigant, la disciplina che fa dapi in temp il pli fitg mal il chau. Betg tschientavels u dieschavels, mabain mintgamai duas secundas e dapli ha Lara Gut-Behrami pers sin las pli spertas en questa disciplina durant la stagiun passada. Ina suletta giada è ella stada classada sut las top 15, quai gist a l’entschatta da la stagiun a Sölden.
Enavos en l’Italia
Da chasa è Lara Gut-Behrami puspè ad Udine en l’Italia, quai suenter che ses um, il giugader da ballape Valon Behrami, n’ha betg tegnì or ditg tar il FC Sion. Valon Behrami ha giugà dal 2017 fin il 2019 tar Udinese.
Lara Gut-Behrami ha midà bler en vista a la stagiun 2019/2020. La Tessinaisa ch’ha gudagnà il 2016 sco emprima skiunza svizra suenter Vreni Schneider il classament general da la cuppa mundiala è dentant da buna speranza ch’ella è sin la dretga via en la terza stagiun suenter sia greva blessura. Al campiunadi mundial da skis il 2017 a San Murezzan è Lara Gut-Behrami cupitgada ed ha rut il liom cruschà.
RR actualitad 07:00