Adelboden e Simonet, quai n’è enfin oz anc betg ina grond’amur. Atgnamain sa sentia el bain sin questa plaunca taissa e pretensiusa dal Chuenisbärgli, di Sandro Simonet. Daco ch’i n’haja anc betg funcziunà a questa cursa da chasa na possia el betg dir. Savens fetschia el simplamain memia blers patratgs durant la cursa enstagl da simplamain ir cun skis sco quai ch’el fetschia en ils trenaments. Là tegn Simonet, che vegn dapi onns titulà sco in dals gronds talents da slalom, mintgamai pitg cun ils leaders en il cader svizzer enturn Daniel Yule u Ramon Zenhäusern.
Er en questa stagiun n’ha Sandro Simonet anc betg propi persvadì. En las emprimas trais cursas è el crudà ora. Sulet en il davos slalom a Zagreb ha el cuntanschì in resultat cuntentaivel cun ses 21avel plaz. En il slalom dad Adelboden na vul el perquai betg mo gudagnar ils proxims puncts en la cuppa mundiala, mabain finalmain er ina giada far pasch cun quella plaunca dal Chuenisbärgli. Silsuenter sa legra il skiunz da 25 onns sin ils ulteriurs classichers che suondan il schaner; Wengen, Kitzbühel e Schladming.