Siglir tar il cuntegn

Header

audio
Tina Weirather metta da la vart ses skis
Or da Actualitad dals 25.03.2020.
laschar ir. Durada: 02:46 minutas.
cuntegn

Ski alpin Tina Weirather terminescha sia carriera

Suenter 15 onns e 222 cursas en la cuppa mundiala prenda Tina Weirather cumià da la tribuna da skis. Cunquai vegn uschia in grond num a mancar a la partenza la proxima stagiun.

La feglia da las legendas Harti Weirather e Hanni Wenzel avess gugent prendì cumià sin in’autra moda dal circus da skis, ma quai n’è betg stà pussibel pervia dal coronavirus. Ma era senza quai happy end dastga la skiunza dal Principadi dal Liechtenstein esser cuntenta e loscha sin sia carriera.

Tina Weirather
Legenda: Tina Weirather avant in onn a Crans-Montana. Keystone

Da cullas da cristal fin medaglias

Il 2005, cun mo 16 onns, ha Weirather dà ses debut en la cuppa mundiala. Tut en tut è ella la finala stada 41 giada sin il podest. 9 cursas ha ella gudagnà, quai en trais differentas disciplinas. Sia disciplina da parada è dentant stà il super-G. Là ha ella er gudagnà duas giadas la culla da cristal e duas medaglias ad eveniments gronds, ina giada argient al campiunadi mundial il 2017 a San Murezzan ed in onn pli tard bronz als gieus olimpics a Pyeongchang en la Corea dal Sid.

Bleras operaziuns ils emprims onns

Tina Weirather ha dentant er stuì magunar bain inqual frida durant sia carriera. Gia cun 21 onns aveva ella stuì laschar operar 7 giadas il schanugl e 5 giadas il maun. Quai che resta sajan dentant las bellas regurdientschas, ils success, la buna cumpagnia e tut la glieud che hajan lavurà ensemen cun ella durant tut quels onns, uschia la skiunza da 30 onns.

RTR actualitad 17:00