Da vart sportiva aveva la curridra svizra Fanny Smith gia dominà en la qualificaziun cun il meglier temp – la cursa da final ha ella dentant gudagnà en in fotofinish. Smith è vegnida emprima avant la Svedaisa Sandra Näslund, la victura da la cuppa mundiala da l'onn passà. Per la dunna svizra è quai la 14avla victoria en la cuppa mundiala.
Success svizzer er tar ils umens
Tar ils umens ha gudagnà Jonas Lenherr. Per il skiunz da 29 onns è quai la terza victoria en la cuppa mundiala. Lenherr ha gudagnà avant il Svedais Oehling Norberg. Sin plazza trais è in ulteriur svizzer, Alex Fiva.
Mancanza da naiv ha custà gnerva als organisaturs
Atgnamain avessan las cursas da ski-cross gì lieu gia ils 11 da december. Pervi da la mancanza da naiv èn las cursas dentant vegnidas spustadas curt avant la cursa.
Per il comité d’organisaziun èn las ultimas emnas stadas intensivas. Las ultimas emnas hajan duvrà bler pazienza e gnerva conceda era il schef dal comité d’organisaziun, Noldi Heiz. Els avevan gia fatg il november l’emprima naiv, ma lura èsi vegni pli chaud ed i ha era pluvì:
Avant bun 10 dis avevi en l’arrivada in pitschen lai.
Per che las cursas han tuttina pudì vegnir fatgas ha il team da Noldi Heiz stuì dar gas l’ultima emna: Bun 40 persunas han dà tut per che Arosa ha savì manar atras las cursas da skicross.
RR actualitad 07:10+