Skydive – sa sentir sco in utschè

Siglir ord in aviun direcziun terra ed uschia pudair sgular per in mument sco in utschè, insatge che fascinescha blers, tranter auter er Andi Duff da Turitg. Per el è il mument en l’aria in’enorma libertad.

Cumenzà cun quest sport ha Andi Duff gia da giuven, pia avant plirs decennis. Oz cun 52 onns ès el dentant anc adina fascinà dal sport da skydiving.

In sport sco in auter era

Ch’il sport da skydive saja pli malsegirs ch’in auter sport na lai Andi Duff betg valair. Ins emprendia mintga pass che saja da far e tut saja segirà fitg bain. Tuttina saja da sa concentrar e pratitgar quest sport fitg serius e betg far tuppadads. Quai valia dentant era per sports sco il ir cun skis u cun velo. Tar il sport da skydive vegn siglir ord in aviun sin bun 4'000 meters sur mar e lura sgulà cun passa 200 kilometers l’ura envers la terra. Quai vul dir ch'ins possia sgular bun ina minuta avant che trair il parasol.

Indoor Skydiving a Sion

Dapi in temp datti en Svizra in emprim chanal da sgular endadens, l’uschenumnà Indoor Skydiving. Quest chanal u simulatur per trenar il sport da skydive sa chatta a Sion en il Vallais. L’avrigl 2013 è vegnì cumenzà cun las lavurs per quest indriz, lavurs ch’han cuzzà bun in onn. Il chanal ha in’autezza da 24 meters e lubescha era ad uffants da trenar da sgular. Era ils dus buobs dad Andi Duff, Kim ch’ha 11 onns e Jon ch’ha 6 onns, èn fascinads dal sport da skydiving e treneschan oz en il chanal da vent a Sion.

Ils 18 e 19 da november vegn organisà a Sion ils emprims campiunadis svizzers da sgular endadens, ils Swiss Indoor Skydiving Championships 2016.