Il podest
- Michelle Gisin, Svizra, 1:42.05
- Katharina Liensberger, Austria, +0.11
- Mikaela Shiffrin, USA, +0.57
Gisin ha ristgà en il segund percurs il maximum, e la tactica da la skiunza da la Svizra Centrala è stada la dretga. Ella ha fatg or dal pitschen retard da 2 tschientavels sin Shiffrin che manava suenter l'emprim percurs – in avantatg dad 11 tschientavels sin Liensberger e passa ina mesa secunda sin Shiffrin.
Vitiers gudogna Michelle Gisin sco emprima Svizra dapi il 2002 in slalom da la cuppa mundiala. Lura è Marlies Oester stada la davosa victura svizra d'in slalom da la cuppa mundiala. E la Svizra da 27 onns fa fin cun in'ulteriura seria excepziunala: ils davos 28 slaloms da la cuppa mundiala avevan gudagnà u Mikaela Shiffrin u la Slovaca Petra Vlhova.
Las ulteriuras Svizras
Dasper Gisin ha er Wendy Holdener mussà ina stupenta prestaziun. Ella ha terminà la cursa sin plaz 5. E cun Mélanie Meillard sin plaz 20 ha ina terza Svizra pudì ramassar puncts.