Siglir tar il cuntegn

Header

Purtret da lavurers che rumieschan las tribunas da la naiv.
Legenda: Las lavurs per pinar las pistas na pon betg vegnir finidas a temp, perquai è la cursa vegnida desditga. Keystone
cuntegn

Naziunal/Internaziunal Slalom gigant a Garmisch desditg

Suenter la cursa rapida èsi ussa cler ch'era il slalom gigant a Garmisch na po betg vegnir realisà. La blera naiv ch'i ha dà da sonda sin dumengia fa nunpussaivel da preparar las pistas a temp.

Perquai che las prognosas da l'aura na vesan n'er betg ora meglras per las proximas uras, èn ils organisaturs sa decis da desdir la cursa, e quai gia bun trais uras avant ch'ella cumenza. Sur notg avevi dà radund 30cm naiv nova en la Bavaria.

Il slalom gigant fiss stada l'ultima bilantscha avant ils campiunadis mundials ad Are che cumenzan en dus dis. Sche la cursa vegn pigliada suenter n'è anc betg cler. Suletta opziun fiss tenor il schef da cursa da la FIS, Markus Waldner Kranjska Gora en Slovenia. Ils 9 e 10 da mars han gia lieu duas cursas tecnicas. Gist suenter cumenza il final da la cuppa mundiala a Soldeu.

Sco remplazzament per la cursa da sonda examinescha la FIS Kvifjell nua ch'i duai dar l'entschatta mars duas cursas da speed.

RR novitads 09:00