Il segund percurs dal slalom gigant da las dunnas n'ha oz betg pudì vegnir manà tras. Suenter che ferms vents han gì derschì parts da la zona d'arrivada sco er raits da segirezza, han ils responsabels decidì da desister dal segund percurs. La segirezza da las skiunzas na fiss betg stada garantida.
Da principi dovri per ina cursa da slalom gigant adina dus percurs durant il medem di. Da far in segund percurs in auter fiss teoreticamain pussaivel. Ils responsabels han suenter examinaziuns e discussiuns dentant decis da desister sin in segund percurs il mardi a bun'ura. Tenor la previsiun da l'aura cuntinueschian ils vents ferms anc e per la notg avessi da naiver.
Il program per il slalom da mardi resta dentant: 1. percurs a las 15:15, segund percurs a las 18:30.
Michelle Gisin cun bunas schanzas sin plaz da podest
Sin la pli svelta, la Slovaca Petra Vlhova, ha Gisin pers en l'emprim percurs be 35 tschientavels secunda. La victura dals emprims dus slaloms gigants da questa stagiun, la Taliana Marta Bassino, è sco segunda stada be 13 tschientavels pli svelta che la skiunza da la Svizra Centrala.
Er sa qualifitgadas per il segund percurs èn Lara Gut-Behrami sco 6avla, Wendy Holdener sco 11avla e Corinne Suter sco 23avla. Betg tanschì per il segund percurs hai a Mélanie Meillard, Camille Rast, Jasmina Suter e Priska Nufer.
