Siglir tar il cuntegn

Header

Zan Kanjec durant la cursa.
Legenda: Il Sloven Zan Kranjec gudogna il slalom gigant ad Adelboden. Keystone
cuntegn

Slalom gigant Nagin di svizzer ad Adelboden

Loic Meillard ch'era sin curs da podest suenter l'emprim percurs dal slalom gigant croda lunsch enavos. Il victur dad Adelboden ha num Zan Kranjec e vegn da la Slovenia.

A Loic Meillard, ch'era terz suenter l'emprim percurs dal slalom gigant ad Adelboden, na gartegia betg da repeter la prestaziun en il segund percurs. Meillard croda enavos sin il 17avel plaz. El è entant tuttina il meglier Svizzer.

Sin il victur Zan Kranjec da la Slovenia perda Meillard bunamain duas secundas. Il podest ad Adelboden vegn cumplettà cun Filip Zubcic da la Croazia ch'è l'emprima giada en sia carriera sin il podest en la cuppa mundiala. Terz cun exact il medem temp èn il Franzos Victor Muffat-Jeandet ed il Norvegais Henrik Kristoffersen. Per il victur Kranjec èsi sia segunda victoria suenter quella a Saalbach-Hinterglemm avant passa in onn.

Segund meglier Svizzer daventa il Grischun Daniele Sette. Partì cun il numer 51 era Sette 13avel suenter l'emprim percurs. Era al skiunz da 27 onns da San Murezzan na gartegia betg da repeter la cursa perfetga da l'avantmezdi. Sette croda enavos e vegn 19avel cun in retard da 2,3 secundas. Il skiunz dal cader B da Swiss Ski fa cun quest plaz ses emprims puncts en la cuppa mundiala.

Ils ulteriurs Svizzers èn Cédric Noger sco 22avel e Justin Murisier sco 24avel. Gino Caviezel, Thomas Tumler ed Elia Zurbriggen èn crudads ora en l'emprim percurs.

RTR novitads 12:00

Artitgels legids il pli savens

Scrollar a sanestra Scrollar a dretga