Siglir tar il cuntegn

Header

cuntegn

Naziunal/Internaziunal Slopestylers festiveschan victoria dubla

Andri Ragettli e Fabian Bösch han procurà per ina fin perfetga da la stagiun da slopestyle en la cuppa mundiala. Ils dus giuvens han festivà a Silvaplauna ina victoria dubla. Tar las dunnas è Giulia Tanno vegnida segunda.

La victoria da Andri Ragettli è stada meritada. Il giuven freestyler da 17 onns ha survegnì en omadus runs da final passa 90 puncts. Mintga sigl avess tanschì per la victoria. Cunquai ha Ragettli era gudagnà la cuppa mundiala generala. Fabian Bösch ch’ha 18 onns ha cun ses segund sigl pudì far in pass dal 7avel enavant sin il segund plaz. Terz è vegnì il Norvegiais Oystein Braaten.

Tanno segunda

Tar las dunnas è Giulia Tanno siglida sin il segund plaz, quai tar ses emprim en il final. Gudagnà ha la Svedaisa Emma Dahlström ch’ha survegnì bunamain 10 puncts dapli che la Svizra.

Skicross dunnas: Katrin Müller sper il podest

Tar il final da la cuppa mundiala da skicross ad Arosa ha Katrin Müller procurà per il meglier resultat ord vista svizra. La giuvna da 26 onns è sa qualifitgada per l’emprima gia dapi dus onn per il final. Là ha ella stuì sa cuntentar cul il quart e davos plaz. Tuttina è quai il meglier resultat per las dunnas svizras en questa stagiun da skicross. Gudagnà ad Arosa ha la Svedaisa Anna Holmlund che ha er segirà la cuppa mundiala generala.

Skicross umens: Alex Fiva meglier svizzer

Tar ils umens è il Grischun Alex Fiva vegnì 8avel ed è uschia stà il meglier svizzer. L’auter Grischun, Armin Niederer, è sco Jonas Lenherr crudà ora gia en il quartfinal.

audio
Saira: Cuppa mundiala da skicross ad Arosa
ord Actualitad dals 04.03.2016.
laschar ir. Durada: 2 minutas 52 Secundas.

Il final dals umens è ir a fin cun in pitschen drama. Il Franzos Jean-Frédéric Chapuis ch’era a la testa è cupitgà curt avant l’arrivada uschia ch’il Russ Semen Denschtschikow ha la finala triumfà ad Arosa. Il Franzos Chapuis gudogna perencunter la cuppa mundiala generala da skicross.

RR novitads 15.00

Artitgels legids il pli savens