Il snowboardist Iouri Podladtchikov terminescha sia carriera da profi per immediat. Quai ha ditg il Turitgais da 31 onns envers il «Tagesanzeiger». El ha influenzà la scena da snowboard svizra durant passa in decenni. Ils ultims onns ha el dentant adina puspè gì da sbatter cun blessuras e problems da sanadad.
Medaglia d'aur a Sotschi il 2014
Ses pli grond success ha Podladtchikov pudì festivar als gieus olimpics a Sotschi il 2014 nua ch’el ha gudagnà aur en la halfpipe. Ultra da quai ha el gudagnà trais medaglias a campiunadis mundials (1x aur, 2x argient) set medaglias als X-Games e 14 giadas è el stà sin il podest da la cuppa mundiala.
Plans per il futur
Uss tira Podladtchikov pia in stritg final sut sia carriera da sportist. Plans per il futur ha el er: El veglia esser artist; fotografar e scriver – e surtut sautar.
