La staffetta svizra dals umens cun Beda Klee, Dario Cologna, Jason Rüesch e Roman Furger vegn segunda a Lahti en la Finlanda. Sulettamain il Norvegiais Johannes Høsflot Klæbo è stà en il sprint final pli svelt che Roman Furger. Il team da la Russia cumplettescha il podest.
Ils Svizzers han durant l'entira cursa mussà ina stupenta prestaziun. Tar mintga surdada han els tutgà tar la gruppa a la testa. Er sche Roman Furger ha profità in pau dal tempo moderà, tuttina ha el en il sprint anc pudì vargar ils Russ e Talians sin ils davos meter.
Sulettamain ina giada hai dà in meglier resultat per ina staffetta svizra dals umens - tar la victoria il 2010 a La Clusaz. Gia da lez temp era il Jauer Dario Cologna da la partida.
Victoria norvegiaisa er tar las dunnas
Er tar las dunnas ha la staffetta norvegiaisa ina giada dapli cumprovà sia rolla da favurit. Tiril Udnes Weng, Ingvild Flugstad Østberg, Therese Johaug e Heidi Weng han gudagnà la staffetta da 4 x 5 km cun in avantatg da 30 secundas sin il quartet da la Finlanda. Terzas èn vegnidas las Svedaisas. Staffetta svizra n'è nagina stada a la partenza.
RTR novitads 14:00