Siglir tar il cuntegn
cuntegn

Naziunal/Internaziunal Stan Wawrinka en la segunda runda da l'Australian Open

Il Svizzer ha cuntanschì la proxima runda a Melbourne suenter che ses adversari Ernests Gulbis da la Lettonia ha dà si la partida durant il segund set. Tar las dunnas ha Timea Bacsinszky cuntanschì la segunda runda. A fin è il turnier però per Stefanie Vögele Viktorija Golubic.

Stan Wawrinka è sa qualifitgà per la proxima runda dal turnier da Grand Slam. Il Svizzer ha profità dal fatg che Gulbis ha stuì dar si la partida. El ha stuì vegnir tractà vi dal dies. L'emprim set aveva Gulbis gudagnà cun 6:3. En il segund set manava dentant Wawrinka cun 3:1 cura che Gulbis ha dà si.
En la segunda runda frunta Wawrinka u sin il matador local Nick Kyrgios u sin il Canadais Milos Raonic.

Er Bacsinszky ina runda vinavant

Timea Bacsinszky è en la segunda runda dal turnier da Grand Slam a Melbourne. La Svizra ha battì la Russa Daria Kassatkina cleramain en dus sets cun 6:3 e 6:0. L'entira partida be cuzzà 55 minutas.

En la proxima runda frunta Bacsinszky sin in'ulteriura Russa, numadamain Natalja Wichljanzewa.

Vögele e Golubic out

Percunter è il turnier da Grand Slam a fin suenter l'emprima runda per in'autra Svizra: Stefanie Vögele da l'Argovia n'ha gì nagina schanza en la partida cunter la giugadra dal Taiwan Hsieh Su-Wei. En pli pauc ch'in'ura ha ella pers gist cun 2:6, ed 1:6.

Suenter Stefanie Vögele perda er Viktorija Golubic cleramain en l'emprima runda da l'Australian Open. La Turitgaisa da 26 onns ha pers cunter l'Ucranaisa Jelina Switolina en dus sets cun 1:6, e 2:6.

Gia ier han Roger Federer, Henri Laaksonen e Belinda Bencic gudagnà lur partida da partenza a l'Australian Open 2019.

RR novitads 06:00++