Siglir tar il cuntegn

Header

cuntegn

Naziunal/Internaziunal Stan Wawrinka gudogna l'US Open

Il Romand ha battì en il final dal US Open il Serb Novak Djokovic, la numra 1 dal mund, cun 6:7, 6:4, 7:5 e 6:3. Igl è gia il terz titel da Grand Slam per Wawrinka, dentant igl emprim a New York. Cun questa victoria ha Stan Wawrinka uss gia gudagnà 11 finals en roda.

audio
Bunura: Valitaziun dal final da l'US Open Wawrinka - Djokovic
ord Actualitad dals 12.09.2016.
laschar ir. Durada: 7 minutas 32 Secundas.

Cumenzà ha il gieu meglier per Novak Djokovic. En igl emprim set ha il Serb spert realisà in break ed ha giugà ferm. Wawrinka percunter ha fatg blers sbagls e gì gronds problems cun l'emprim service. Encunter la fin dal set è il Romand lura vegni meglier en il gieu ed ha anc dumagnà il re-break ed uschia il pass en il tie-break. Là n’ha lura Wawrinka betg giugà bain ed ha pers claramain quest gieu da decisiun curta ed uschia l'emprim set.

Participaziun al final d'ATP

Avrir la box Serrar la box

Stan Wawrinka ha cuntanschì sco terz giugader suenter Novak Djokovic ed Andy Murray definitivamain in plaz als finals ATP dal november a Londra. Wawrinka è uschia per la quarta giada en seria da la partida al turnier dals megliers la fin da la stagiun. Ils onns 2013 e 2015 era el mintgamai crudà ora en il mezfinal.

Mo Stan Wawrinka è immediat sa concentrà sin il proxim set, n’ha betg laschà irritar da quest mal tie-break. El ha puspè giugà meglier ed ha pudì rumper atras il service da Djokovic al 3:1. Sin quest break ha Djokovic anc pudì reagir, il Svizzer ha lura dentant decidì il segund set cun in segund break al 6:4. Wawrinka ha giugà pli ferm che Djokovic che ha fatg en questa fasa dapli sbagls.

Uschia èsi ì vinavant. Wawrinka ha giugà ferm, Djokovic ha fatg sbagls ch’ins n’enconuscha uschiglio betg dad el. Surtut ha il numer in dal mund nizzegià mal las schanzas da break. Vitiers ha lura anc ina blessura vid il det dal pe impedì Djokovic en il davos set. Il pli tard lura è la via da Stan Wawrinka tar ses emprim titel al US Open stada libra. Il Svizzer ha gudagnà a moda meritada e cun sang fraid ses terz titel da Grand Slam.

RR novitads 06:00

Artitgels legids il pli savens