Siglir tar il cuntegn

Header

Navigaziun

cuntegn

Naziunal/Internaziunal Start da stagiun cun dischillusiun

Il snowboardist engiadinais Nevin Galmarini era bain il pli svelt en la qualificaziun per il slalom gigant parallel – suenter è el dentant crudà ora en l'otgavel-final a Carezza (I). Quai scriva l'agentura da novitads SDA.

Galmarini che passa cun l'aissa sur la lingia en l'arrivada.
Legenda: Plazza 9 en cursa nummer 1: Per Nevin Galmarini è l'emprima cursa da la stagiun gia a fin en l'otgavel final (maletg dal mars 2018). Keystone

Per Nevin Galmarini, ch'era partì sco favurit en la cursa, finescha cun l'out en il otgavel final il start en la stagiun da cursa sin la novavla plazza e cun quai cun ina dischillusiun en sia disciplina da parada. Gia davent da la partenza saja quai stà ina cursa, en la quala ch'el haja be savì reagir e betg agir, ha ditg Galmarini suenter la cursa.

La proxima schanza datti gia puschmaun: La sonda è il slalom gigant parallel da notg a Cortina d'Ampezzo (I).

Pauc success er tar las dunnas svizras

Sco Galmarini èn er Patrizia Kummer e Ladina Jenny crudadas ora en l'emprima runda. Sco unica atleta svizra saja vegnida vinavant Julie Zogg – ma be fin en il quartfinal. Là ha ella pers cunter la gronda favurita, Ester Ledecka da la Tschechia.

Ledecka n'ha dentant er betg savì terminar l'emprima cursa da stagiun cun ina victoria: Tar las dunnas gudogna la Taliana Nadya Ochner.

RR novitads 16:00