Per la decisiun ha Valentin Stocker procurà. L’attatgader da Hertha Berlin ha tutgà en la 89avla minuta al 3:2, quai cun ses emprim contact insumma vid la balla. Stocker era vegnì sin il plaz per Admir Mehmedi be ina minuta avant. Igl è stà la terza giada che la Svizra è ida en avantatg encunter ils Ungarais.
Curt suenter pausa ha Haris Seferovic laschà giubilar l'emprima giada la Svizra, cun ses gol al 1:0. Be duas minutas pli tard ha Adam Szalai dentant pudì egualisar per l’Ungaria.
En la 67avla minuta ha Ricardo Rodriguez tutgà al 2:1, cun ses emprim gol insumma en il tricot da la naziunala. Be quatter minutas pli tard pront la reacziun dals Ungarais. Cun ses segund gol ha Adam Szalai danovamain pudì egualisar per l’equipa che vegn trenada dal Tudestg Bernd Storck. Sin il 3:2 da Valentin Stocker n’ha l’Ungaria dentant betg pli pudì reagir, era ha il temp mancà.
Glindesdi dat la naziunala svizra gia il proxim gieu da qualificaziun, quai ordaifer encunter l’Andorra.
Classament da la gruppa B
| 1. | Svizra | 5:2 | 6 |
| 2. | Inslas Feroe | 2:0 | 4 |
| 3. | Portugal | 6:2 | 3 |
| 4. | Lettonia | 1:2 | 3 |
| 5. | Ungaria | 2:3 | 1 |
| 6. | Andorra | 0:7 | 0 |
RR novitads 23:00