Siglir tar il cuntegn
Inhalt

Naziunal/Internaziunal Suenter Lake Louise dat er Beaver Creek en l'aua

Perquai ch’i ha memia pauc naiv e temperaturas memi’autas ha er la cursa dals umens a Beaver Creek stuì vegnir dada giu.

Il skiunz Patrick Küng.
Legenda: Patrick Küng e co. na vegnan per ina giada betg a filar a Beaver Creek. Keystone (Archiv)

Son Pieder na manegia actualmain betg bain cun ils fans da skis: Suenter la renunzia da la cursa a Lake Louise ha uss er stuì vegnir dadas giu las concurrenzas planisadas a Beaver Creek.

Emprima desditga totala dapi 15 onns

Ils spezialists da sveltezza dal circus dal ski alpin ston vinavant avair pazienza. Pervi da temperaturas chaudas e mancanza da naiv na pon las cursas a Beaver Creek ch’eran planisadas per l’emprima fin d’emna da december betg avair lieu. Dals 2 fin ils 4 da december eran planisadas per ils umens ina cursa rapida, in super-G ed in slalom gigant. L’ultima giada eran tuttas cursas vegnidas desditgas il 2001 a Colorado.

Termin da reserva nuncler

Er las emprimas cursas a Lake Louise (26 e 27 da november) crodan en l’aua ord las medemas raschuns. Uss dovra quai termins da remplazzament per tschintg cursas. Tenor la FIS duai quai dar soluziuns uschè svelt sco pussaivel.

RR novitads 10:00