Siglir tar il cuntegn

Header

cuntegn

Naziunal/Internaziunal SUI 1: BEL 2 - Svizers onurads mal per in gieu spectacular

Las svizras ed ils svizzers pon s’allegrar: la squadra dal trenader Petkovic ha mussà oz en in gieu spectacular ch’ella è en gamba per il champiunadi europeic. Suenter in bun gieu perda ella en l’81avla minuta Seferovic pervi dad ina carta cotschna ed en la 93avla minuta il gieu cun 1:2.

Las situaziuns decisivas dal gieu

  • En la 31avla minuta realisescha Blerim Dzemaili cun il 1:0 la surpraisa e maina in avantatg la Svizra encunter il numer 2 dal mund. Mo 3 minutas suenter èsi a fin cun l’avantatg: Romelu Lukaku egualisescha per la Belgia. Cun 1:1 va igl en la pausa. En l’emprima mitad ha vis il public in gieu attractiv ed egualisà.
  • En l’81avla minuta croda en sasez la decisiun a favur da la Belgia: Haris Seferovic survegn ina carta cotschna per avair insultà l’arbiter. E bravamain realisescha Kevin De Bruyne 3 minutas suenter il gol da victoria per la Belgia.
  • L’arbiter lascha giugar fin a la 93avla minuta - lura tschivla el: la naziunala Svizra perda cun 1:2 encunter la Belgia quai gieu da test.

La naziunala svizra sa prepara a Lugano

Dapi prest in’emna sa prepara la naziunala Svizra a Lugano sin il campiunadi europeic da ballape. En il Tessin è vegnì trenà fitg serius e per part avant ina gronda culissa da fans.

Il clima en l’equipa, il plaschair e l’optimissem èn qua. Las blamaschas en ils davos dus gieus da test il mars encunter l’Irlanda e la Bosnia-Erzegovina audan tar il passà. A Genevra vulan ils Svizzers mussar in’emprima reacziun sin la sceptica e la critica dal davos temp e procurar per in signal positiv.

La Belgia cun in ensemble da stars

Encunter la Belgia n’è la Svizra betg il favurit. In pari pudess uschia gia esser in bun resultat che pudess er dar gronda motivaziun e confidenza en vista al campiunadi d’Europa.

La Belgia, l’equipa da Marc Wilmots, posseda in cader da classa mundiala. En tut las retschas figureschan gronds stars dal ballape che dattan tar las meglras adressas en l’Europa sco Chelsea, Barcelona, Liverpool u Atlético Madrid. Il star da l’equipa è franc Kevin de Bruyne che dat actualmain tar Manchester City.

Al davos campiunadi mundial il 2014 en la Brasilia ha la Belgia cuntanschì il quartfinal. En Frantscha vul la Belgia dentant dapli. Per blers auda l’equipa Marc Wilmots tar in dals favurits sper la Germania, la Frantscha e la Spagna.

RR actualitad 17:00++

Artitgels legids il pli savens