La gronda part dal gieu ha il FC Sion fatg buna parita en il St.-Jakob-Park. Dentant ils giugaders da Basilea han nizzegià pulit consequent lur schanzas e gudagnà cun 4:2. Cunquai ha l’equipa da Ciriaco Sforza l’emprima giada dapi la 4. runda puspè ina bilantscha levamain positiva. Tschintg victorias stattan cunter quatter terradas.
Il FCZ senza puncts
L’elan dal FC Turitg suenter midar il trenader vegn franà cun ina terrada a chasa. Ils Turitgais perdan cunter il FC Son Gagl cun 1:2. Per l’equipa dal trenader Peter Zeidler è il success impurtant, damai ch’il club è stà pervi da cas da corona dapi ils 22 da november senza gieu.
Servette cun in segn da vita
Ina victoria impurtanta ha era il FC Servette cuntanschì. Il 2:0 a Vaduz munta en il tschintgavel gieu ordaifer l’emprim success – ed ils emprims gieus en in stadion ester. A Vaduz resta vinavant la laterna cotschna.