Siglir tar il cuntegn

Header

cuntegn

Naziunal/Internaziunal Svizra gudogna emprim gieu il 2016

La naziunala Svizra da ballape ha gudagnà il davos gieu da test avant il campiunadi d’Europa en Frantscha. Ils Svizzers han gudagnà a Lugano encunter la Moldavia cun 2:1.

Blera confidenza n’ha l’equipa da Vladimir Petkovic betg gudagnà ord quest davos gieu da test avant l’EURO.

audio
Sportissimo: Ballape - Co vesi or per la naziunala svizra suenter l'ultim gieu da test?
ord Sportissimo dals 04.06.2016.
laschar ir. Durada: 4 minutas 9 Secundas.

Malgrà la victoria n’ha la Svizra betg dal tut persvadì encunter il numer 159 da la rangaziun mundiala da la FIFA. Ils Svizzers èn bain stads per gronda part en il possess da la balla, en l’offensiva han las ideas dentant mancà.

Mehmedi cun la decisiun

Procurà per l’emprima victoria il 2016 ha Admir Mehmedi. Il giugader da Bayer Leverkusen ha tuc en la 75avla minuta al 2:1. Curt avant aveva Ginsari pudì egualisar per l’equipa da l’ost. L’emprim gol per la Svizra ha Blerim Dzemaili sajettà en la 12avla minuta. Il sajet da Dzemaili ha dentant il goli da la Moldavia anc manà en gol, uschia ch’i è stà in autogol dal goli Namasco.

Albania, Rumenia e Frantscha

Glindesdi sgola la naziunala Svizra direcziun Montpellier, il da chasa da l’equipa da Petkovic durant il campiunadi d’Europa. L’emprim gieu dat la Svizra lura ils 11 da zercladur a Lens encunter l’Albania. Quatter dis pli tard frunta la Svizra a Paris sin la Rumenia ed ils 19 da zercladur vegni tar il davos gieu da gruppa a Lille encunter il favurit da gruppa, la Frantscha.

RR novitads 20:00

Artitgels legids il pli savens