Siglir tar il cuntegn

Header

Impressiun Swiss Epic 2018
Legenda: Al Swiss Epic van mintgamai a la partenza teams da dus. mad
cuntegn

Swiss Epic 2019 350 km e 12'000 meters d’autezza

Il Swiss Epic, la cursa da mountainbike cun tschintg etappas, maina quest onn per l’emprima giada tras il Grischun. A la partenza van 300 equipas cun mintgamai dus participants, uschè blers sco anc mai.

Il Swiss Epic, il frar pitschen dal legendar Cape Epic en l’Africa dal Sid, ha giu premiera il 2014. Ils davos tschintg onns è questa cursa mintgamai stada en il Vallais, tranter Verbier e Zermatt. Per ils proxims tschintg onns è il Swiss Epic en il Grischun, quest onn en la regiun da Tavau, San Murezzan e Lai. En tschintg dis han ils participants d’absolver radund 350 kilometers cun total 12’000 meters d’autezza.

Participants da l'entir mund

Il spezial vid il Swiss Epic è ch’igl vegn sa participà en teams da dus. A la partenza èn uschia passa 600 atletas ed atlets, davent da profis fin mountainbikers da hobi. La gronda part dals participants èn Svizzers, numnadamain 180. Ina buna part è er Grischuns sco per exempel ils Sursilvans Andrin Beeli da Sagogn, Sascha Deplazes da Sedrun, Nina Brenn da Flem u ils Engiadinais Fadri Barandun da Samedan u il passlungist cun impediment Luca Tavasci che va a la partenza cun ses collega Kilian Badrutt. A la partenza è tranter auter er Corina Gantenbein da Claustra che parta en la cuppa mundiala. Al Swiss Epic va ella a la partenza cun Kathrin Stirnemann. Blers participants derivan dentant er da l’exteriur, ina gronda part da l’Africa dal Sid. A la partenza èn dentant sportists da tut il mund.

5 etappas a Tavau, San Murezzan e Lai

Il Swiss Epic 2019 è dals 20 fin ils 24 d’avust. L’emprima etappa maina da Tavau a San Murezzan. Suenter in segund di en l’Engiadin’Ota maina la terza etappa da San Murezzan a Lai. La quarta etappa maina sin ils trails al pe dal Rothorn e cun l’etappa finala turnan ils participants puspè enavos a Tavau.

RR actualitad 17:00