Al Swiss Epic da quest onn, che tutga tar la seria mundiala da cursas da la seria Epic tar la quala er il Cape Epic en l’Africa dal Sid fa part, van a la partenza la crème de la crème dal sport da mountainbike. Cun dus campiuns olimpics, plirs campiuns mundials e blers talents giuvens è la cursa da tschintg dis occupada uschè ferm sco anc mai.
Glista da partenza Swiss Epic 2020:
Duel tranter dus campiuns olimpics
Ils gronds favurits èn Nino Schurter che parta ensemen cun ses collega d’equipa Lars Forster. Quest duo aveva gia triumfà l’onn passà ensemen al Cape Epic che vala sco la pli dira cursa da mountainbike insumma.
Per mai èsi fitg spezial da cumbatter per il titel sin mes trails da chasa. Il Swiss Epic manca anc en mes palmarès e nus vegnin a far tut il pussibel da gudagnar questa cursa.
Cun tensiun vegn spetgà in duel tranter Nino Schurter e Jaroslav Kulhavý, in dals gronds rivals da Schurter durant sia carriera. Il Tschec, sez era campiun olimpic e campiun mundial da cross-country, parta ensemen cun Simon Andreassen dal Danemarc.
Annika Langvad e Haely Batten
Tar las dunnas è Annika Langvad la gronda figura a la partenza. La Danaisa parta ensemen cun l’Americana Haley Batten. Langvad, la spezialista da maraton, ha gia gudagnà en sia carriera tschintg giadas il Cape Epic. Schanzas da triumfar al Swiss Epic han er las Svizras Ariane Lüthi ed Alice Pirard.
A la partenza va era Ariella Kaeslin. L’anteriura gimnasta artistica parta en la categoria maschadada ensemen cun ses partenari Oliver Friedrich.
Las 5 etappas dal Swiss Epic 2020:
Segirtad ha prioritad
La pli gronda prioritad en quest temp da corona haja la segirtad, uschia ils organisaturs. Perquai è vegnì mess ensemen in concept fitg detaglià per garantir als participants ina cursa segira. Dischinfectar ils mauns, purtar ina mascra tar la partenza, tegnair distanza, quai mo intginas prescripziuns per ils participants. Plinavant vegn la preschentaziun da bainvegni sco er tut ils briefings manads atras sulettamain online. La partenza succeda en plirs blocs.