Siglir tar il cuntegn

Header

Nino Schurter
Legenda: Nino Schurter (dretg) e Lars Forster han battì l'entira concurrenza ad Arosa. Andreas Wieland
cuntegn

Swiss Epic 2020 Schurter e Forster sin buna via da triumfar

Il duo svizzer cun Nino Schurter e Lars Forster ha er gudagnà la terza etappa dal Swiss Epic. Igl è stà in’etappa da radund 50 kilometers cun bunamain 2’000 meters differenza d’autezza en la regiun d’Arosa. Els han duvrà 2:22.49 uras per questa etappa, la pli curta dal Swiss Epic 2020.

Ils dus favurits han battì ad Arosa ils Talians Fabian Rabensteiner e Samuele Porro per 23 secundas. Sin il terz plaz suondan Kristian Hynek e Martin Stosek da la Tschechia ch’avevan anc gudagnà l’etappa da la mesemna da Laax ad Arosa. Oz han ils Tschecs pers passa 4 minutas sin Schurter e Forster.

En il classament general mainan Nino Schurter e Lars Forster suenter trais da tschintg etappas cun in avantatg da 5:55 minutas sin ils Talians Fabian Rabensteiner e Samuele Porro.

Langvad e Batten ina classa per sasezzas

Tar las dunnas gudognan las duas favuritas Annika Langvad dal Danemarc e l’Americana Haley Batten er la terza etappa ad Arosa, quai cun in avantatg da passa 8 minutas sin la Svizra Jacqueline Schneebeli che parta ensemen cun l’Ollandaisa Sophie Von Berswordt-Wallrabe. En il classament general ha il duo Langvad/Batten augmentà ses avantatg sin passa 25 minutas, sin las duas Tudestgas Stefanie Dohrn ed Elisabeth Brandau ch’èn vegnidas en la terza etappa ad Arosa terzas.

Tut en tut èn radund 200 teams da dus a la partenza. La quarta etappa maina il venderdi d’Arosa a Tavau. Cun 74 kilometers e bun 2’700 meters differenza d’autezza èsi l’etappa roiala dal Swiss Epic 2020.

Actualitad 17:00

Artitgels legids il pli savens

Scrollar a sanestra Scrollar a dretga