Siglir tar il cuntegn

Header

video
Duo Schurter e Forster gudogna classament general
Or da Giuventetgna dals 22.08.2020.
laschar ir. Durada: 2 minutas 2 Secundas.
cuntegn

Swiss Epic 2020 Triumf per Nino Schurter e Lars Forster

Ils dus favurits Nino Schurter e Lars Forster han gudagnà per l'emprima giada ensemen il Swiss Epic, la pli dira cursa da pliras etappas da mountainbike. Il duo svizzer ha er gudagnà la 5avla etappa en la regiun da Tavau, in'etappa sur 60 kilometers e 2'500 meters differenza d'autezza.

audio
Pudair far cursas, ed anc gudagnar, quai legra Nino Schurter e Lars Forster
ord RTR Audio dals 22.08.2020. Maletg: RTR, Andreas Wieland
laschar ir. Durada: 7 minutas 21 Secundas.

In onn suenter ch'els han gudagnà ensemen il Cape Epic en l'Africa dal Sid – n'èn Schurter e Forster era betg stads da franar al Swiss Epic ch'ha manà per la segunda giada tras il Grischun, quest onn da Laax sur Arosa fin a Tavau.

Ils dus collegas d'equipa han gudagnà quatter da tschintg etappas, la davosa en la regiun da Tavau cun in avantatg da 44 secundas, ed èn uschia er stads ils gronds dominaturs a questa cursa d'etappas. La finala han Nino Schurter e Lars Forster triumfà cun in avantatg da passa 10 minutas sin ils Talians Samuele Porro e Fabian Rabensteiner ch'aveva gudagnà il Swiss Epic avant in onn en l'Engiadina. Sin il terz plaz suondan Kristian Hynek e Martin Stosek da la Tschechia, quai cun in retard da bunamain 17 minutas. Ils dus Tschecs èn ils sulets dasper Schurter e Forster ch'han pudì gudagnar in'etappa, la segunda da Laax ad Arosa.

Langvad e Batten ina classa per sa sezzas

Er tar las dunnas han las favuritas gudagnà. Annika Langvad dal Danemarc ensemen cun l'Americana Haley Batten han gudagnà tut las tschintg etappas ed uschia er il classament general. La finala han ellas gì in avantatg da bunamain 40 minutas sin las Tudestgas Stefanie Dohrn ed Elisabeth Brandau. Sin il terz plaz cun in retard da bun 45 minutas suonda la Svizra Ariane Lüthi ch'è partida ensemen cun Alice Pirard da la Belgia.

audio
Andreas Wieland cun in facit dal Swiss Epic 2020
ord RTR Audio dals 22.08.2020. Maletg: RTR, Andreas Wieland
laschar ir. Durada: 6 minutas 4 Secundas.

Podest per Sascha Deplazes

Sper Nino Schurter ha anc in segund mountainbiker rumantsch terminà il Swiss Epic 2020 sin il podest. En la categoria «Masters», quels sur 40 onns, è Sascha Deplazes da Sedrun vegnì terz, quei ensemen cun Markus Fehr dal chantun Turgovia. La davosa etappa a Tavau han els cuntanschì il quart plaz. Durant la terza etappa ad Arosa han Deplazes e Fehr schizunt astgà purtar il tricot sco leaders da questa categoria.

audio
Il pli fitg da morder ha Sascha Deplazes gì il davos di
ord RTR Audio dals 22.08.2020. Maletg: RTR, Andreas Wieland
laschar ir. Durada: 3 minutas 33 Secundas.

En il classament general han Sascha Deplazes e Markus Fehr la finala pers bun in quart ura sin ils duo svizzer cun Norbert Amgarten e Thomas Girardi. Segunds en questa categoria èn vegnids Christoph Sauser e Silvio Bundi, dus anteriurs profis da la cuppa mundiala.

L'onn proxim maina il Swiss Epic 2021 per la terza giada en roda tras il Grischun, pli probabel puspè tras l'Engiadina, quai dals 17 fin ils 21 d'avust.

RTR actualitad 17:00

Artitgels legids il pli savens