Siglir tar il cuntegn

Header

Purtret dals dus sin il velo en la grada da l'arrivada. Els dattan in a l'auter
Legenda: Lars Forster e Nino Schurter tras l'arrivada da l'emprima etappa a Laax Murschetg. mad
cuntegn

Swiss Epic Schurter e Forster gudognan a Laax

Nino Schurter e Lars Forster han cumenzà cun success il Swiss Epic 2020, la cursa da mountainbike sur 5 dis ch‘ha cumenzà oz a Laax. Il duo svizzer ha duvrà per l’emprima etappa ch‘ha manà sur 60 kilometers cun 2’500 meters differenza d‘autezza da Laax fin al Crap Masegn enavos a Laax bun 3 uras.

Ils dus favurits èn uschia stads bun ina minuta e 20 secundas pli sperts ch‘il duo talian cun Fabian Rabensteiner che veva triumfà avant in onn al Swiss Epic en l‘Engiadina. Il Tschec Jaroslav Kulhavy, in dals gronds rivals da Schurter en la cuppa mundiala, ha pers ensemen cun ses collega danais Simon Andreassen passa 20 minutas e stuì sa cuntentar cun il 21avel plaz.

Tar las dunnas ha la favurita Annika Langvad dal Danemarc ensemen cun l‘Americana Haley Batten gudagnà questa emprima etappa a Laax. Ellas han distanzià il duo svizzer cun Sina Frei e Nicole Koller per bun otg minutas.

Alla partenza èn passa 200 teams da dus, tranter auter era intgins prominents sco l'anteriur skiunz e campiun olimpic Didier Défago u l'anteriura gimnasta artistica Ariella Kaeslin.

Damaun, mesemna, maina la segunda etappa dal Swiss Epic da Laax ad Arosa, quai sur ina distanza da 75 kilometers cun 2'600 meters differenza d'autezza.

RTR novitads 14:00

Artitgels legids il pli savens

Scrollar a sanestra Scrollar a dretga