D'in normal supercup sa mesiran il campiun svizzer ed il victur da la cuppa svizra a l'entschatta da la stagiun. Questas decisiuns per ils titels n’èn dentant betg crudadas, damai che la pandemia ha interrut la stagiun.
Perquai lantscha Swiss Unihockey la «Final Four Edition» cun mintgamai quatter clubs. Per il titel da las dunnas giogan sper Piranha Cuira – Kloten-Dietlikon, Bern-Burgdorf ed Emmental-Zurbrück. Ils adversaris da Alligator Malans tar ils umens èn Wiler-Ersigen, Köniz e Zug. Il turnier en la «Saalsporthalle» a Turitg ha lieu ils 29 e 30 d’avust.
