Il HCD ha battì il club tschec da Oceláři Třinec cun 3:1. Ils emprims dus gols per Tavau ha il rinforzament da Lugano Linus KIasen sajettà. Il terz gol è stà in uschenumnà empty netter da Dino Wieser.
En il mezfinal frunta Tavau sin il club finlandais da KalPa Kuopio.
En l'auter mezfinal gioga il favurit, il Team Canada cunter ils Ice Tigers da Nürnberg. Ils Ice Tigers han eliminà surprendentamain ils stars russ da Metallurg Magnitogorsk, quai grazia ad ina victoria da 3:1.
Metallurg – l'emprim en il quartfinal, ed uss or dal turnier
Fertant che KalPa Kuopi e Team Canada avevan gudagnà en lur gruppas ed eran uschia sa qualifitgads direct per il mezfinal ha Metallurg Magnitogorsk stuì giugar oz en il quartfinal – e quai cunter ils Ice Tigers da Nürnberg. Gia quai valeva sco surpraisa. Ch'ils stars russ vegnan perfin a crudar or dal turnier avessan pensà probablamain ils pli paucs.
Avant la partida valeva la squadra da Metallurg Magnitogorsk cun ses giugaders da clav Nikolai Kulemin, Viktor Antipin, Matt Ellison e Dennis Rasmussen sco clera favurita. La primavaira avevan ils organisaturs da la Cuppa Spengler anc annunzià cun gust ch'ina da las meglras equipas da hockey da la Russia vegnia puspè a giugar a la Cuppa Spengler a Tavau.
Bler da ses savair sin il glatsch n'ha Metallurg dentant betg mussà en l'ediziun 2018 da la Cuppa Spengler.
RR actualitad 15:00++
