Siglir tar il cuntegn

Header

cuntegn

Naziunal/Internaziunal Team Canada sco spetgà en il mezfinal

Cun ina prestaziun persvadenta è il Team Canada sa qualifitgà direct per il mezfinal da la Cuppa Spengler. El ha battì ils Ice Tigers da Nürnberg cun 6:2.

Sulet en l’emprim terz han ils Canadais gì in zic fadia. Suenter il prim gol ch’è crudà gia en la terza minuta èn els daventads memia passivs. Pir cura ch’ils Ice Tigers han egualisà la partida, èn ils Canadais svegliads ed han sajettà en il segund terz quatter gols.

Strusch ch’il davos terz ha cumenzà è gia il 6:1 crudà entras il medem giugader che aveva gia sajettà l’emprim gol, Dante Fabbro. Fin a la fin ha Nürnberg anc sajettà in segund gol al resultat final da 6:2.

KalPa gudogna 1:0 en la prolungaziun

Purtret dals giugaders en cumbat.
Legenda: En l'emprim terz èn ils Finlandais stads pli ferms, cunter fin han els dentant pers la clera mira. Keystone

L’autra equipa ch’è gia sa qualifitgada direct per il mezfinal è KalPa Kuopio. Ils Finlandais han gudagnà cunter Metallurg Magnitogorsk da la Russia cun 1:0 suenter prolungaziun.

KalPa Kuopio e Metallurg Magnitogorsk

Avrir la box Serrar la box

Ils Finlandais èn quest onn preschents a la Cuppa Spengler cun ina squadra giuvna, pauc enconuschenta sur ils cunfins dal pajais. Lur star stat a la banda: Sami Kapanen n'è tar KalPa betg be trenader e coach, mabain er gist il possessur dal club. Cun il Canadais Ryan Wilson ha il club in giugader cun experientscha a la Cuppa Spengler. Il 2016 ha el cuntanschì cun il HC Lugano il final, però pers quel cunter il team Canada cun 2:5.

HK Metallurg Magnitogorsk gioga dapi 5 onns davanttiers en la KHL. L'equipa da la Russia ha gudagnà il campiunadi ils onns 2014 e 2016. La davosa giada è il club stà il 2005 a la Cuppa Spengler ed ha gudagnà.

Quai vul dir ch’i vegn en ils quartfinals a las suandantas partidas: Metallurg Magnitogorsk cunter ils Ice Tigers da Nürnberg (sonda, las 15:10) e HC Tavau cunter Trinec (sonda, las 20:15).

RR actualitad 15:00++

Artitgels legids il pli savens