Siglir tar il cuntegn

Header

Swiss Cycling
Legenda: Equipa svizra cun (da san.) Thomas Litscher, Sina Frei, Alexandre Balmer, Noëlle Buri, Luke Wiedmann ed Elisa Alvarez. www.swiss-cycling.ch
cuntegn

Team Relay Medaglia da bronz per equipa svizra

A l’equipa svizra n’èsi betg reussì da defender il titel en la cursa da staffetta, il team relay, al campiunadi mundial da mountainbike a Leogang en l’Austria. Suenter trais giadas aur ils davos trais onns han ils Svizzers stuì sa cuntentar quest onn cun la medaglia da bronz.

Il sextet cun Sina Frei (dunnas elita), Thomas Litscher (umens elita), Noëlle Buri (dunnas U23), Alexandre Balmer (umens U23), Luke Wiedmann (umens U19) e la Grischuna Elisa Alvarez (dunnas U19) n’è mai propi stà a la testa, respectiv en il cumbat da medaglias. Pir en la davosa runda ha Alexander Balmer anc pudì manar sia equipa dal 5avel plaz enavant sin il podest. La finala ha l’equipa svizra pers bun duas minutas sin la Frantscha, il nov campiun mundial.

Rangaziun Team Relay:

  1. Frantscha 1:27.34
  2. Italia + 1.35
  3. Svizra + 2.06
  4. Stadis Unids + 2.55
  5. Gronda Bretagna + 3.04
  6. Austria + 3.58

Per la Svizra va uschia ina seria a fin. Ils davos trais onns avevan ils Svizzers mintgamai gudagnà aur, quai er grazia a Nino Schurter ch’ha sco Jolanda Neff desistì quest onn sin la cursa da staffetta. Ils dus gronds trumfs svizzers sa concentreschan cumplainamain sin la cursa singula da cross country la sonda, ils 10 d’october.

Actualitad 17:00

Artitgels legids il pli savens

Scrollar a sanestra Scrollar a dretga