Belinda Bencic ha gudagnà cun Slovan Bratislava la Extraliga slovaca, in pendant da l'Interclub svizzer. La pausa da turniers pervia dal coronavirus passenta Bencic – che ha geniturs da la Slovachia – a Bratislava, la chapitala da la Slovachia. Questa circumstanza ha il numer 1 dal tennis da dunnas da la Svizra nizzegià per sa participar a l'uschenumnada Extraliga.
Tar ses trais singuls ha Bencic mo ina giada gì in zic problems. Cunter Anna Karolina Schmiedlova ha ella la finala gudagnà en il tiebreak dal set decisiv. Cunter Laura Svatikova e Tereza Mihalikova ha Bencic dà giu be dus games.
Cura che Bencic po puspè sa participar a turniers da WTA è anc avert. Anc fin la fin da fanadur è il Tour interrut. Ils proxims dis vegnan spetgadas ulteriuras decisiuns.
